Her ýylyň 6-njy iýunynda bütin dünýäde Rus dili güni bellenilýär. Russiýada bu baýram Puşkin güni diýlip atlandyrylýar. Çünki 1799-njy ýylyň 6-njy iýunynda häzirki zaman edebi rus diliniň esaslandyryjysy hasaplanýan, döredijiligi bilen dünýä medeniýetini baýlaşdyran beýik rus şahyry Aleksandr Sergeýewiç Puşkin dünýä inipdir.
Aşgabatda beýik şahyryň adyny göterýän Bilelikdäki türkmen-rus umumybilim berýän orta mekdebiniň okuwçylarynyň ýerine ýetirmeginde Puşkiniň goşgulary belentden ýaňlandy. Ýaş zehinleriň çykyşlary bilen beýik şahyryň mirasyna goýulýan çuňňur hormatyň ajaýyp utgaşmasy özboluşly ruhy atmosferany döredip, tanyş eserleriň täze öwüşginlerini açyp görkezdi.
Puşkiniň doglan gününe bagyşlanan çäre beýik rus şahyrynyň ajaýyp seýilgähdäki ýadygärligine gül goýmak dabarasy bilen tamamlandy. Dabara Türkmenistanyň Russiýadaky ilçihanasynyň geňeşçi-ilçisi Aleksandr Wasilýew, daşary ýurtlaryň diplomatik wekilhanalarynyň wekilleri, paýtagtyň ýaşaýjylary hem-de myhmanlary gatnaşdylar.
