Türkmenistanyň Garaşsyzlygynyň 35 ýyllygynyň baýram edilmegi mynasybetli Türkmenistanyň at gazanan artisti Wladimir Mkrtumow saz sungatyny söýüjileri aýratyn interaktiw duşuşyga çagyrýar. «PRO MUZYKU» atly döredijilik tapgyrynyň çäginde geçiriljek konsert-sapagy 28-nji sentýabrda sagat 19:00-da «Arkaç» söwda we dynç alyş merkezinde geçiriler.
Güýzüň ajaýyp agşamy tomaşaçylara konsert zalynyň çäginden çykmazdan, dünýäniň dürli künjeklerine gyzykly sazly syýahata çykmagyna mümkinçilik döreder. Maestronyň ussat ellerindäki fortepiano bir agşamlyk hakyky «Gündogar ekspressine» öwrülip, diňleýjileri şu ugurlar boýunça syýahata alyp gider:
Italiýadaky dynç alyş;
Pariž agşamlary;
Gündogar ekspressi.
Sazly syýahatyň soňky menzili diňleýjileri iň esasy duralga — eziz Watanymyzyň, milli gözbaşlaryň mekanyna alyp geler. Çäräni guramaçylarynyň pikirine görä, dünýäniň dürli künjeklerine edilen islendik syýahat diňe öýüňe dolanyp geleniňde öz hakyky manysyna eýe bolýar.
Agşamyň maksatnamasynda dünýä we milli nusgawy saz sungatynyň ajaýyp eserleriniň janly ýerine ýetirilişi bar. Saz eserleriniň ýerine ýetirilişi gyzykly gürrüňler, täsin maglumatlar, şeýle hem kompozitorlaryň hatlaryndan we ýol ýazgylaryndan bölekleriň okalmagy bilen utgaşdyrylar.
Çäre «mahmal möwsümi» diýlip atlandyrylýan güýz döwrüne mahsus nepis we mähirli ýagdaýda geçiriler.
Sene we wagty: 28-nji sentýabr, sagat 19:00
Geçiriljek ýeri: «Arkaç» söwda we medeni dynç alyş merkezi
Zalyň kiçi we özboluşly formaty bilen baglylykda, orunlaryň sany çäklidir.
Maglumat almak we ýerleri öňünden bron etmek üçin telefonlar:
+993 63 508877
+993 64 037456
+993 63 467177
