Türkmenistanyň paýtagtynda Garaşsyz Döwletleriň Arkalaşygyna agza ýurtlaryň demir ýol ulagy boýunça Geňeşiniň 84-nji halkara mejlisi geçirilýär. Bu forum Azerbaýjanyň, Ermenistanyň, Belarusuň, Gazagystanyň, Gyrgyzystanyň, Russiýanyň, Täjigistanyň, Özbegistanyň we Türkmenistanyň demir ýol edaralarynyň ýolbaşçylaryny bir ýere jemledi. Şeýle hem duşuşygyň giň gerimli formatynda Owganystanyň, Gruziýanyň, Eýranyň we Latwiýanyň ulag edaralarynyň wekilleri, Estoniýanyň demir ýollarynyň ýolbaşçylary, şeýle-de halkara kärdeşler arkalaşyklarynyň we GDA-nyň Ýerine ýetiriji komitetiniň synçylary gatnaşýarlar.
Mejlisiň gün tertibi sebitiň demir ýol ulgamlarynyň işiniň esasy ugurlaryny, şol sanda 2025-nji ýylda we 2026-njy ýylyň başynda ýerine ýetirilen işleriň hem-de ýolagçy gatnatmak ulgamynyň netijelerini jikme-jik seljermegi öz içine alýar.
Gatnaşyjylar otlularyň hereketiniň tehnologik kadalaryny tassyklamak, konteýner parkynyň sanawynyň netijeleri we özara ykdysady hasaplaşyk meselelerine aýratyn üns berýärler. Şunda üstaşyr (tranzit) we döwletara gatnawlar üçin amatly şertleri döretmäge gönükdirilen Ylalaşylan nyrh (tarif) syýasatynyň Konsepsiýasyny durmuşa geçirmäge strategik ähmiýet berilýär.
Esasy maksatnama bilen bir hatarda, «Ýaş demirýolçular» atly II foruma gatnaşyjylar üçin okuw maslahaty guraldy. Onuň çäklerinde pudagy ösdürmek boýunça çekişmeler, ikitaraplaýyn duşuşyklar we metbugat brifingleri meýilleşdirildi.
Myhmanlar üçin baý medeni maksatnama hem taýýarlanyp, olar Aşgabadyň atçylyk sport toplumyna, Döwlet muzeýine we «Magtymguly Pyragy» medeni-seýilgäh toplumyna baryp görerler. Bu bolsa kabul ediji tarapyň belent myhmansöýerliginiň nyşanydyr.
Mejlisiň dowamynda kabul ediljek çözgütleriň integrasiýa işlerine uly itergi berjekdigine we tutuş Arkalaşygyň sebitiniň ulag-logistika kuwwatyny pugtalandyrmagyna garaşylýar.
