Paýtagtymyzyň bedenterbiýe we sport baradaky Baş müdirliginiň Ýöriteleşdirilen küşt we şaşka mekdebiniň binasynda küşt boýunça ýurdumyzyň Gran-pri ýaryşynyň Aşgabat tapgyry tamamlandy.
Halkara Küşt federasiýasynyň (FIDE) kadalaryna laýyklykda we halkara reýtingi hasaba almak bilen geçirilen ýaryşa 270-den gowrak küştçi gatnaşdy.
Ýaryş şweýsar ulgamy boýunça 9 tapgyrda geçirildi. Onuň netijeleri şeýle boldy:
Açyk dereje:
1. Annamuhammet Hommadow, 100 göterimlik netije görkezdi (9 oýundan 9 utuk), Aşgabat şäheriniň Ýöriteleşdirilen küşt we şaşka boýunça mekdebi.
2. Ali Ahmedow, Aşgabat şäheriniň Ýöriteleşdirilen küşt we şaşka boýunça mekdebi.
3. Şahruh Turaýew – Türkmenistanyň Küşt federasiýasy.
Zenanlaryň arasynda:
1. Aýa Baýramowa, Lebap welaýatynyň Türkmenabat şäherindäki 13-nji sport mekdebi.
2. Mähri Agamyradowa, Lebap welaýatynyň Türkmenabat şäherindäki 13-nji sport mekdebi.
3. Nurana Söýunowa, «Küşt älemi» akademiýasy, Aşgabat.
Ýeňijileri sylaglamak dabarasynda küşt boýunça Türkmenistanyň milli ýygyndy toparynyň resmi sport lybasynyň tanyşdyrylyşy hem geçirildi. Türgenlerimiz 13–18-nji maý aralygynda Gazagystanyň Astana şäherinde geçiriljek Türki döwletleriň birinji Küşt olimpiadasynda şu lybaslarda milli sportumyzyň abraýyny gorarlar.
Aşgabat tapgyrynyň doly netijeleri bilen şu salgy arkaly tanşyp bilersiňiz.
