Türkmenistanyň Futbol federasiýasy ýurdumyzda futbolyň hilini ýokarlandyrmak, tälimçiler düzüminiň hünär derejesini kämilleşdirmek we halkara standartlaryna laýyk getirmek ugrundaky netijeli işlerini dowam etdirýär. Şeýle çäreleriň çäginde paýtagtymyz Aşgabat şäherinde Aziýa Futbol konfederasiýasynyň (AFC) hem-de Türkmenistanyň Futbol federasiýasynyň (TFF) bilelikde guramagynda «B» derejeli diplomyny almak ugrundaky tälimçilik okuwy dowam edýär.
Şu günki günde döwrebap futbol diňe bir fiziki taýýarlygy däl-de, eýsem, çuňňur taktiki bilimi, analitiki çemeleşmäni we dogry psihologik dolandyryşy hem talap edýär. AFK-nyň «B» lisenziýasy ugrundaky bu okuw hem hut şu maksatlara gönükdirilip, oňa gatnaşýan tälimçilere futbolyň iň kämil tilsimlerini, oýun taktikalaryny we analitikany öwretmegi maksat edinýär.
Okuw maksatnamasy iki esasy tapgyrdan ybaratdyr:
Toretiki (nazary) okuwlar: Taktiki seljermeler, oýunçylaryň psihologiýasy, meýilleşdirme we döwrebap futbolyň ösüş maksatlary.
Praktiki (tejribe) okuwlar: Meýdançada dürli kombinasiýalary, goranyş we hüjüm taktikalaryny iş ýüzünde kämilleşdirmek.
Bu okuwy üstünlikli tamamlan tälimçiler, ýurdumyzyň professional klublarynda we çagalar-sport mekdeplerinde has ýokary derejede iş alyp barmaga hukuk gazanarlar. Türkmen futbolynyň geljegi bolan ýaş zehinleri kemala getirmekde bu okuwyň ähmiýeti örän uludyr.
