Birleşen Milletler Guramasynyň Ösüş maksatnamasy (BMGÖM) Türkmenistanyň Ýokary kazyýeti bilen bilelikde kazyýet ulgamynyň wekilleri üçin halkara tejribesine bagyşlanan okuw maslahatyny geçirdi. Maslahat kazyýet ulgamlarynyň sanly transformasiýasy we özgerdilmegi meselelerine gönükdirildi.
Bu çäre kazyýet ulgamyny sanlylaşdyrmagy goldamaga we kazyýet işiniň amala aşyrylmagynda döwrebap sanly çözgütleri ornaşdyrmaga gönükdirilen BMGÖM-niň we Türkmenistanyň Ýokary kazyýetiniň bilelikdäki başlangyjynyň çäklerinde guraldy.
Okuw maslahatynyň dowamynda BMGÖM-niň halkara bilermenleri sanly kazyýeti ornaşdyrmagyň iň gowy halkara tejribeleri barada çykyş etdiler. Şeýle-de olar elektron kazyýet işini ýöretmek, raýatlar üçin sanly hyzmatlary döretmek, kazyýet dolandyryşyny awtomatlaşdyrmak, şeýle hem sanly tehnologiýalaryň kömegi bilen kazyýet işiniň netijeliligini we aýdyňlygyny ýokarlandyrmak barada giňişleýin maglumat berdiler.
Bu okuw maslahaty bilelikdäki başlangyjy durmuşa geçirmegiň amaly tapgyrynyň başlanandygyny alamatlandyrdy. Bu tapgyryň çäklerinde Estoniýadan gelen halkara bilermenler Türkmenistanyň kazyýet ulgamynyň häzirki sanly ýagdaýyna, şol sanda hukuk, guramaçylyk, tehniki we funksional taraplaryna hemmetaraplaýyn seljerme geçirmäge başladylar.
Geçirilen baha bermeleriň netijeleri boýunça Türkmenistanyň kazyýet ulgamyny sanlylaşdyrmagyň «Ýol kartasynyň» taslamasy taýýarlanar. Bu resminama döwrebap sanly tehnologiýalary ornaşdyrmagyň ileri tutulýan ugurlaryny, kazyýet dolandyryşynyň netijeliligini ýokarlandyrmak boýunça çäreleri, kazyýet işlerini dolandyrmagy kämilleşdirmegi we sanly hyzmatlar arkaly raýatlaryň adalatlylyga elýeterliligini giňeltmegi kesgitlär.
