Maýa Kulyýewa adyndaky Türkmen milli konserwatoriýasynda Türkmenistanyň sungatda at gazanan işgäri, konserwatoriýanyň dosenti Ýuriý Gurgenowiç Sarkisowyň 80 ýaş ýubileýine bagyşlanan «Durmuş kitaby» atly ýubileý konserti geçirildi.
Dabaraly çäre sazandalaryň birnäçe neslini bir ýere jemledi: konserte Ýuriý Gurgenowiçiň maşgala agzalary, ýakyn dostlary, ýokary okuw mekdebiň öňdebaryjy mugallymlary hem-de talyplary gatnaşdy. Ilkinji pursatlardan başlap konsert aýratyn täsirli ýagdaýy emele getirdi — halypa kirişli saz gurallary ansamblynyň joşgunly çykyşy bilen garşy alyndy.
Maksatnamanyň esasy bezegi maestronyň döredijilik mekdebini dowam etdirijileriň çykyşlary boldy. Onuň köpüsi eýýäm abraýly saz bäsleşikleriniň baýraklaryna eýe bolan ýaşlar bolup, halypanyň zehinli şägirtleri ýokary ýerine ýetirijilik ussatlygyny görkezip, türkmen we dünýä nusgawy aýdym-saz eserleriniň baý çemenini diňleýjilere hödürlediler.
Maksatnamadaky her bir çykyş tomaşaçylaryň dowamly el çarpyşmalary bilen garşylandy. Bu bolsa Ýuriý Sarkisowyň milli saz pedagogikasyny ösdürmäge, medeni mirasy gorap saklamaga hem-de ýaş zehinleri terbiýeläp ýetişdirmäge goşan goşandyny ýene bir ýola tassyklady.
