17–19-njy mart aralygynda Türkmenistanyň Söwda-senagat edarasynyň binasynda ykdysadyýetiň döwlete dahylly bolmadyk pudagynyň gazananlaryna bagyşlanan sergi we Türkmenistanyň Senagatçylar we telekeçiler birleşmesiniň döredilmeginiň 18 ýyllygy mynasybetli birleşmäniň agzalarynyň maslahaty geçiriler.
Bu çäre türkmen telekeçileriniň mümkinçiliklerini hem-de olaryň importyň ornuny tutýan önümçiligi ösdürmek we eksporty artdyrmak baradaky döwlet strategiýasyny durmuşa geçirmäge goşýan goşantlaryny görkezmek üçin ähmiýetli meýdança bolar.
Ýeri gelende bellesek, telekeçilik başlangyçlaryny goldamak we dünýäniň öňdebaryjy tejribesini ornaşdyrmak şu günki günde döwlet syýasatynyň ileri tutulýan ugurlarydyr. Döredilen şertler ýurdumyzyň telekeçilerine hem-de senagatçylaryna ýokary tehnologiýaly önümçilikden başlap, hyzmatlar ulgamyna çenli dürli pudaklarda öňdebaryjy orunlary eýelemäge ýol açýar.
Sergi hususy pudagyň işiniň ähli esasy ugurlaryny diýen ýaly öz içine alar:
Azyk howpsuzlygy: Et we şöhlat, guşçulyk, balyk hem süýt, konditer önümleri, guradylan miweler we täze gök önümler.
Senagat we gurluşyk: Döwrebap gurluşyk serişdeleri, mebel önümçiligi, elektron enjamlary we ýeňil senagat.
Dokma we moda: Dokma senagatynyň täze önümleri we döwrebap eşikleri tikmek hyzmatlary.
Hyzmatlar ulgamy we bilim: Bilim, poligrafiýa, mahabat we bezeg işlerindäki innowasiýalar.
Halk hünärmentçiligi: Milli däpleri dowamata besleýän hünärmenleriň üýtgeşik işleri we zergärçilik önümleri.
Sergi paýtagtymyzyň ýaşaýjylary we myhmanlary üçin ýokary hilli ýerli önümler bilen tanyşmaga, işewür toparlar üçin bolsa täze hyzmatdaşlary tapmaga we geljegi uly bolan maýa goýum taslamalaryny ara alyp maslahatlaşmaga ajaýyp mümkinçilikdir.
