Ýurdumyzyň Söwda-senagat edarasynyň Sergi merkezinde işewürlik gün tertibini we dizaýn ulgamynda gazanylan üstünlikleri özünde jemleýän «TurkmenTextile Expo — 2026» halkara sergi-ýarmarkasy öz işine başlady.
Sergi-ýarmarkanyň esasy maksady Türkmenistany halkara dokma we moda industriýasynyň möhüm merkezi hökmünde tanatmakdan, milli dokma mirasyny görkezmekden, pudaga innowasiýalary ornaşdyrmaga ýardam etmekden hem-de halkara hyzmatdaşlygy berkitmekden ybaratdyr.
Üç günläp dowam etjek forum dokma senagatynyň öňdebaryjylaryny, ýokary tehnologiýaly enjamlary işläp düzüjileri, bilermenleri we dünýä belli dizaýnerleri bir meýdançada jemläp, ýokary moda dünýäsi bilen birlikde, ählumumy işewürlik üçin möhüm waka öwrüldi.
Dünýäniň moda industriýasynyň esasy şahsyýetleriniň: meşhur britan moda öýüniň — «Vivienne Westwoodyň» baş direktory Karlo D’Amarionyň, şeýle-de italiýan «Fashion Channel» telekanalynyň esaslandyryjysy Marsio Noçeranyň gatnaşmagy çärä aýratyn öwüşgin berýär.
4-nji we 5-nji iýun günleri maksatnamanyň iň gyzykly pursatlary — «ot-kutýur» (haute couture) we «pret-a-porte» (prêt-à-porter) ýygyndylarynyň halkara görkezilişleri bolar. Fransiýadan, Marokkodan, Omandan, Russiýadan we Merkezi Aziýa ýurtlaryndan gelen modelýerler hem öz işlerini görkezerler. Milli dizaýn mekdebine bolsa meşhur türkmen brendleri: «Goç Ýigit», «Gülýaka Lybaslary», «Emine Bridal», «Däp», «Peýkam» we ýurdumyzyň öňdebaryjy modelýerleri wekilçilik ederler.
Estetiki tarapyndan başga-da, forumyň düýpli işewürlik maksatnamasy bar. Onda durnukly ösüşe, ekologik sertifikatlaşdyryşa hem-de medeni miras bilen döwrebap brendingiň utgaşmasyna bagyşlanan bilermenleriň maslahatlaryny (seminarlaryny) geçirmek meýilleşdirilýär.
Şeýle hem daşary ýurtly myhmanlar üçin Türkmenistanyň öňdebaryjy dokma toplumlaryna gezelenç guralýar. Sergi ýurduň dokma pudagynyň innowasiýalar we ekologik jogapkärçilik esasynda ählumumy bazara üstünlikli goşulyşýandygyny aýdyň görkezýär.
Türkmenistanyň Dokma senagaty ministrligi we Türkmenistanyň Söwda-senagat edarasy «Turkmen Expo» kompaniýasy bilen hyzmatdaşlykda serginiň esasy guramaçylary hökmünde çykyş edýärler.
