Paýtagtymyzda «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi öz işine başlady. Bu çäre ýurdumyzda giňden bellenilýän Saglygy goraýyş we derman senagaty işgärleriniň gününe bagyşlandy.
Ajaýyp forum döredijilik toparlarynyň joşgunly aýdym-sazly çykyşlary bilen başlandy. Ýylyň-ýylyna innowasion tehnologiýalara we giň halkara hyzmatdaşlyga daýanýan täzeçil pikirdir çemeleşmeleri hödürlemek bilen, foruma gatnaşýan ýurtlaryň sany yzygiderli artýar. Sergide ýurdumyzyň saglygy goraýyş ulgamynyň ösüş depgini, Türkmenistanyň lukmançylyk ylmynda we senagatynda, ilatyň saglygyny goramakda ýeten sepgitleri, ägirt uly kuwwaty, daşary ýurtly hyzmatdaşlaryň bu ulgamdaky işjeň gatnaşyklara barha artýan gyzyklanmalary öz beýanyny tapýar.
Bu ýerde Watanymyzyň saglygy goraýyş we derman senagaty ulgamyndaky mümkinçilikleri giňişleýin beýanyny tapýar. «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergä ýurdumyzyň hususy kärhanalary — Türkmenistanyň Senagatçylar we telekeçiler birleşmesiniň agzalary-da gatnaşýarlar. Ýurdumyzyň şypahana-dynç alyş toplumynyň wideoşekillerinde ilatyň saglygyny berkitmek, sagdyn durmuş ýörelgelerini wagyz etmek boýunça alnyp barylýan köpugurly işler görkezilýär.
Bilim ulgamynda ýetilen sepgitler hem gözden geçirilişiň möhüm bölegini düzýär. Bu ugurdaky wideoşekiller, diwarlyklar myhmanlary ýurdumyzda sanly bilimiň yzygiderli ilerledilişi bilen tanyşdyrýar. Ol innowasiýalaryň, täze bilimleriň, ylymlaryň, öňdebaryjy tehnologiýalaryň, bäsdeşlige ukyplylygyň möhüm hereketlendiriji güýjüdir.
Bedenterbiýe we sport ulgamynda gazanylan üstünlikleri şöhlelendirýän pawilýonlardyr şekiller bolsa Watanymyzyň sport ýurduna öwrülendigini aýdyňlygy bilen görkezýär. Bu ýerde hormatly Prezidentimiziň baştutanlygynda raýatlarymyzyň saglygyny berkitmek, ildeşlerimizi bedenterbiýe, sport bilen meşgullanmaga çekmek, sagdyn durmuş ýörelgelerini ornaşdyrmak boýunça alnyp barylýan köpugurly öz beýanyny tapýar.
«Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi üç günläp dowam edýär.
