Telefonyňyza täze habar gelmedik bolsa-da, ony açyp görýän wagtyňyz bolýarmy? Käbir adamlar muny hatda özleri hem duýman, günüň dowamynda onlarça gezek gaýtalaýarlar. Munuň sebäbi nämekä?
Munuň esasy sebäpleriniň biri — habarnamalara we täze maglumatlara garaşmak. Telefona habar, bildiriş gelende, beýnimiz muňa üns berýär. Wagtyň geçmegi bilen adam täze bir zadyň gelip-gelmändigini barlamaga endik edip bilýär.
Ýene bir sebäp — ýadanymyzda ýa-da garaşýan wagtymyz telefona güýmenmegimiz. Nobata garaşanymyzda, ulagda ýa-da işiň arasynda boş wagt tapanymyzda köpümiz awtomatiki ýagdaýda telefonymyzy açýarys. Şeýlelikde, telefon wagty doldurmagyň iň aňsat serişdesine öwrülýär.
Sosial ulgamlar hem bu endigi güýçlendirip bilýär. Täze wideolar, habarlar we beýleki adamlaryň paýlaşýan zatlary yzygiderli täzelenýär. Şonuň üçin hem, adam «Belki, täze bir zat çykandyr» diýen pikir bilen programmany täzeden açýar.
Käwagt telefona seretmek üçin bize hatda hakyky sebäp hem gerek däl. El telefonymyz ýanymyzda bolsa, ony açyp görmek adaty hereket ýaly bolup başlaýar. Birnäçe wagtdan soň bolsa bu hereket endige öwrülýär.
Show more