Üzärlik müňýyllyklardan bäri halk tebipçiliginde giňden ulanylan, häzirki zaman ylmy lukmançylygynda bolsa uly gyzyklanma döredýän tebigy ösümlikleriň biridir. Türkmenistanyň çöllük we ýarym çöllük sebitlerinde giňden ýaýran bu ösümlik halk arasynda «keramatly derman», «gözden-dilden goraýan ot» hökmünde hem tanalýar. Üzärligiň özboluşly ysly tohumynyň we ýakylmagy bilen döreýän tüssäniň ruhy hem fiziki arassalaýjy täsiriniň bardygy bellenilýär.
Sowuklama we bokurdagyň agyrysy ýaly alamatlar ýüze çykanda, üzärligiň tüssesinden dem almak peýdaly hasaplanylýar. Halk arasynda üzärlik tüssesiniň adam ruhuny ýeňilleşdirýändigi, stresden saplaýandygy barada ynanç bar. Üzärlik tohumynyň içilmeginiň içege parazitleriniň çykarylmagyna kömek edýändigi käbir çeşmelerde bellenilýär.
Häzirki zaman lukmançylyk barlaglarynda hem üzärligiň käbir maddalarynyň peýdaly täsirleri ylmy taýdan subut edilýär. Üzärlikde bar bolan alkaloid maddalar käbir bakteriýalaryň we wiruslaryň ösmegine garşy göreşýär. Şonuň üçin hem, dürli deri ýokançlyklarynda çalynýan melhemleriň düzümine goşulýar.
Şeýle-de bolsa, üzärlik güýçli täsirli alkaloidleri saklaýan ösümlik bolany üçin, ony çäkli möçberde ulamak möhümdir. Artykmaç mukdarda ulanmak ýürek urşunyň düýpli üýtgemegine, nerw ulgamyna zeper ýetmegine sebäp bolup biler.
