10-njy awgustda Altaý döwlet uniwersiteti (ADU, Barnawul, Russiýa Federasiýasy) hem-de Dagly Altaý döwlet uniwersiteti tarapyndan bilelikde gurnalan giň gerimli halkara taryhy-etnografik ekspedisiýasy başlandy. 18-nji awgusta çenli dowam etjek meýdan ylmy-barlag işleri Altaý ülkesiniň we Altaý Respublikasynyň çäginde geçirilýär.
Meýdan topary ýerli türki halklaryň — altaýlylaryň, kumandinleriň, çelkanlaryň, tubalarlaryň we telengitleriň jemlenişip ýaşaýan uzakdaky obalaryna, senetçilik merkezlerine hem-de sebitiň etnografik muzeýlerine baryp görer.
Alymlaryň esasy wezipeleri gadymy däp-dessurlary, halk hünärmentçiligini we ýerli ýaşaýjylaryň özboluşly durmuş ýörelgelerini öwrenmekden, milli lybaslaryň, folkloryň we dil aýratynlyklarynyň sypatlaryny hasaba almakdan, şeýle hem maddy we maddy däl mirasy gorap saklamak boýunça häzirki zaman etnomedeni guramalarynyň işine seljerme bermekden ybaratdyr.
Bu gezekki ekspedisiýa şeýle görnüşli taslamalaryň taryhynda iň köp milletli çäre boldy. Bitewi ylmy-barlag toparyna 5 ýurtdan: Russiýadan, Türkmenistandan, Özbegistandan, Gyrgyzystandan we Täjigistandan gelen alymlar hem-de hünärmenler goşuldy.
Ekspedisiýa türki we altaý halklarynyň taryhy-medeni mirasyny, dilini we däp-dessurlaryny toplumlaýyn dersara (multidisissiplinar) öwrenmek üçin Merkezi Aziýa ýurtlarynyň öňdebaryjy uniwersitetlerini we akademiki institutlaryny birleşdirýär.
Taslama sebit döwletleriniň arasyndaky hoşniýetli goşunçylyk we ynsanperwer gatnaşyklarynyň pugtalanmagyna ýardam berýän akademiki diplomatiýanyň kuwwatly guraly bolup hyzmat edýär.
