Gününi sarymsak ysly agyz çaýkama serişdesi bilen başlamak isleýänler az. Alymlar bäş gözlegiň jemleri boýunça maglumatlary ýygnadylar we sarymsak esasly erginleri «Korsodil» ýaly markalarda tapylýan antiseptik bolan hlorgeksidin saklaýan agyz çaýkamaklary bilen deňeşdirdiler. Olar 3% sarymsakly agyz çaýkamak serişdesiniň tüýkülikdäki bakteriýalary bir hepdede 0,2 %-lik hlorgeksidin saklaýan erginden has köp azaldýandygyny anykladylar.
Bu usula gyzyklanma tötänleýin däl. Hlorgeksidin «altyn standart» hasaplanýar, ýöne ol diş emalyna zyýan ýetirip, ony boýap, agyzdaky tagamy üýtgedip we ýanma duýgusyny döredip biler. Mundan başga-da, bu maddanyň mikroblara garşy durmagy baradaky aladalar artýar.
Sarymsak köpden bäri tebigy antimikrob häsiýetleri bilen tanalýar. Ol bedende biologiki taýdan işjeň maddalara öwrülýän bakteriýalaryň we kömelekleriň ösmegine päsgel berýän allisin ýaly köp sanly kükürt saklaýan birleşmeleri öz içine alýar.
Şeýle-de bolsa, kemçiliksiz serişde ýok. Sarymsakly çaýkamanyň goşmaça täsirleri hem bar: agyzda rahatsyzlyk we häsiýetli ys. Sarymsak ekstraktyna reaksiýalaryň himiki antiseptiklere reaksiýalardan has ýeňil bolýandygyny, ýöne şonda-da, üns bermegiň zerurdygyny belleýärler. Barlagçylar munuň irki maglumatlardygyny, köp sanly barlaglaryň laboratoriýa şertlerinde we az sanly gatnaşyjylaryň goşulmagynda geçirilendigini nygtaýarlar. Sarymsakly çaýkamagyň hlorgeksidiniň ornuny tutýan serişde hökmünde resmi taýdan ykrar edilmegi üçin uzak möhletli gözegçilik bilen uly kliniki synaglar gerek.
Show more