Italiýada arheologlar Kolizeýiň golaýynda mozaikalar we freskalar bilen bezelen II asyra degişli binany tapdylar. Bu barada «Reuters» habar berýär.
Neşir binanyň sekiz otagynyň bäşisiniň XVI asyrda gadymy Rimiň ýedi depesiniň biri bolan Kaelian depesinde gurlan ozalky ýokary derejeli ýaşaýyş sebiti bolan «Villa Selimontana» seýilgähinden doly gazylyp çykarylandygyny aýdýar.
Arheologlar iki tutawaçly uly wazanyň töwereginde delfin, balyk, omar we leňňeç şekillendirilen mozaikany, şeýle hem uly gyzyl we gök tegelekler bilen bezelen üçegiň galyndylaryny tapdylar.
Bilermenleriň pikiri mozaikanyň dizaýnynyň Italiýanyň paýtagtyndan, takmynan, 30 kilometr uzaklykda ýerleşýän gadymy Rimiň esasy porty bolan Ostiýadaky ýangyn söndürijileriň ýaşan ýerinde ozal tapylan mozaika bilen örän meňzeşdigini tassyklaýar. Bu binanyň golaýdaky Bäşinji Kohortanyň ýaşan ýerine degişli bolmagynyň mümkindigini görkezýär. Rim imperiýasy döwründe gijelerine ýangyn söndürmek we jemgyýetçilik tertibini saklamak üçin nobatçylar jogapkär bolupdyr.
Şeýle-de bolsa, başga bir gipoteza bar: arheologlar Kaelian depesinden tapylan beýleki tapyndylara meňzeş patrisiýa öýüni hem ýüze çykardylar. Ajaýyp bezegleriň bolmagy bu öňe sürülýän nazaryýeti doly goldaýar.
Show more