Soňky ýyllarda syýahatçylaryň ýokary derejedäki dynç alyş baradaky düşünjeleri düýpli üýtgedi. Häzirki wagtda syýahat diňe kenarda dynç almak däl, eýsem, ýerli ilatyň medeniýetine we durmuş ýörelgesine çümmek bilen baglanyşyklydyr. Ýewropa Syýahatçylyk Komissiýasynyň (ETC) hasabatynda ýewropalylaryň 60 %-iniň dynç alyşlaryny bir sebitde geçirmek we onuň hakyky atmosferasyny doly derejede duýmak isleýändigi tassyklanyldy.
Eger, siz şeýle medeni syýahat gözleýän bolsaňyz, Türkiýe sizi garşylaýar! Belki-de, iň üýtgeşik tejribe size zeýtun hasyly möwsüminiň oktýabrdan ýanwara çenli uzaýan ýeri bolan Egeý kenarynda garaşýar.
Ortaýer deňziniň howasy we asyrlardan bäri dowam edýän däp-dessurlary sebäpli, Türkiýe dünýäde zeýtun we zeýtun ýagyny öndürýän iň uly ýurtlaryň biridir. Howa sowanda ýerli jemgyýetler öz baglaryna baryp, hasyl ýygnamaga başlaýarlar. Syýahatçylar üçin bu asyrlardan bäri bu ýerde bolup geçýän taryhy prosesiň göni şaýady bolmak üçin özboluşly mümkinçilikdir!
Egeý kenary – Türkiýäniň «Zeýtun ýüregi»
Zeýtun agajy Anadoly medeniýetinde aýratyn orun eýeleýär. Hatda onuň şu sebitden gelip çykandygyna hem ynanýarlar. Häzirki wagtda Türkiýe dünýäde zeýtun öndürýän iň öňdebaryjy bäş ýurduň arasynda mynasyp ornuny tapyp, 50-den 80-e çenli dürli görnüşleri ösdürip ýetişdirýär.
Egeý kenary baý mirasyň merkezidir. Ýurduň zeýtun agaçlarynyň 75 % -i şu ýerde ösýär. Zeýtunlar diňe bir önüm däl, eýsem, ýaşaýyş usulydyr.
Çanakkale, Balykesir, Manisa, Izmir, Aýdyn we Mugla sebitlerindäki gadymy agaçlar asyrlaryň taryhyny saklaýar. Hasyl möwsüminiň başlamagy bilen obalar hakyky baýramçylyk ruhydöreýär. Bütin maşgala we jemgyýet bilelikde işleýär. Myhman hökmünde siz baglaryň içinde gezelenç edip, hasyl ýygnamak işine gatnaşyp we hakyky ýerli festiwalyň atmosferasyny başdan geçirip bilersiňiz.
Türk dessury: Iň arassa zeýtun ýagynyň syry
Egeý aşhanasy doly zeýtun we zeýtun ýagyna esaslanýar. Miwe ýetişen mahaly, ýerli ilat ony el bilen ýygmagy makul bilýär - sebäbi diňe şu usul iň ýokary hilli, iň arassa zeýtun ýagyny kepillendirýär.
Baglardan ýygnalan zeýtunlaryň ýerli zawodlara daşalýandygyny we şol ýerde altyn reňkli, hoşboý ysly ýaga öwrülýändigini görüp bilersiňiz. Bu diňe iýmit däl, eýsem, üns bermäge mynasyp gyzykly iş prosesidir.
Zeýtunyň yzlary bilen: Zeýtun agajynyň ýoly
Zeýtun däbini doly duýmak üçin iň gowy ugur Zeýtun agajynyň ýoluny yzarlamakdyr.
Başlaň: Ida daglaryndan syýahatyňyza başlaň we Türkiýäniň ilkinji zeýtun ýag muzeýi bolan Çanakkaledäki Adatepe zeýtun ýag muzeýine baryp görüň. Bu ýer zeýtun ýagynyň, önümiň ýaga öwrülmeginiň taryhyny aýdyň görkezýär.
Aýwalyk: Indiki duralga Balykesirin Aýwalyk etrabydyr. Bu sebit ykrar edilen geografiki alamaty we agzyňy suwardýan Egeý tagamlary bilen meşhurdyr.
Manisa: Manisada 1650 ýaşly Kyrkağaç zeýtun agajyny taparsyňyz. Ol dünýäde heniz hem miwe berýän iň gadymy zeýtun agaçlarynyň biridir.
Izmir we Urla: Izmire tarap geçeliň. Çeşme, Seferihisar we Selçuk ýaly owadan şäherleriň arasynda Urla zeýtun taryhynyň altyn derwezesidir. Bu ýerde gadymy Klazomenaý şäherinden başlap, zeýtun ösdürip ýetişdirmegiň 4000 ýyllyk taryhyny görkezýän Köstem zeýtun ýagy muzeýi ýerleşýär.
Syýahatyňyzyň ahyrynda Urlanyň Mişlen baýragyna mynasyp restoranlarynda ýerli zeýtun ýagy bilen taýýarlanan tagamlaryň lezzetini duýup, ýerli içgi önümleriniň tagamyny dadyp görmegi ýatdan çykarmaň!
