Türkiýe dünýäde dört möwsümiň ählisini bir günde başdan geçirip bolýan az sanly ýurtlaryň biridir. Ýurduň demirgazyk serhedi boýunça uzalyp gidýän Gara deňiz kenary özüniň arassa tokaýlary we mylaýymdan tämiz howasy bilen meşhurdyr.
Gyşyň gelmegi bilen bu sebit üýtgeýär we düýbünden başga, jadyly görnüşe eýe bolýar. Garly dag depeleri, duman bilen örtülen kenarlar, gadymy ýadygärlikler we gyzgyn termal çeşmeler gyşky dynç alyş üçin özboluşly tejribe döredýär. Bu sebitiň «National Geographic» žurnalynyň abraýly «Dünýäniň iň gowulary 2026» sanawyna girizilmegi tötänleýin däl we bu günki gün ol syýahatçylary iň owadan ugurlary bilen garşylamaga taýýar.
Gündogar Gara deňiz sebiti: Garly düzlükler we gadymy miras
Gyşda Gündogar Gara deňiz sebiti öz ajaýyp häsiýetini görkezýär. Ordu we Giresun ak gar bilen örtülen ilkinji sebitleriň hataryndadyr. Şäheri guşuçar belentliginden synlamak üçin Ordu şäherindäki Boztepe dagynyň gerşine asma ýoly bilen çykmak ýa-da Ulugöl kölüniň kenaryndaky rahat bungalolarda dynç almak hakyky gyşky romantikanyň pursatlarydyr. Perşembe etrabyndaky Jeýson burnundaky gadymy ybadathana gyş lybasynda has-da dabaraly görünýär. Häzirki zaman dag lyža merkezi bolan Çambaşy platosy bolsa açyk howada dynç almagy halaýanlar üçin ajaýyp ýerdir.
Giresundaky Kümbet platosy, Göksu trawertinleri we Kuzalan şarlawugy gyşda surata düşürmegi söýýänleriň iň söýgüli ýerlerine öwrüldi. Özboluşly «guş diliniň» (pyşyrdamak arkaly aragatnaşyk) öýi bolan Kuşköý obasy aýratyn ünsi çekýär. Ol ÝUNESKO-nyň maddy däl medeni mirasynyň sanawyna girizildi.
Trabzon Gara deňziň hakyky merjenidir. Garly gaýalaryň arasynda ýerleşýän ÝUNESKO-nyň sanawyna girizilen Panagia Sumela monastyry jadyly ertekiniň gurşawy ýaly görünýär.
Uzungöl we Maçka kölleriniň we Erikbeli platosynyň gyşky peýzažlary islendik syýahatçyny özüne çeker. Hamsiköý obasyndaky we Zigana dag lyža merkezindäki rahat myhmanhanalar dynç alyşyňyzy, hakykatdan hem, ýatdan çykmajak täsirlere beslär.
Rizede Zil galasy we Şenuwa köprüsi garly daglaryň öwüşgininde has-da ajaýyp görünýär. Aýder platosy termal çeşmeleri bilen meşhurdyr we Owit dagy dag lyža hem-de snoubordsyz durmuşy göz öňüne getirip bilmeýänlere garaşýar. Artwin sebiti, Kaçkar we Kafkasör daglary, Şawşat şäheri hem-de Kamili biosfera goraghanasy parahatçylygy we tebigat bilen doly sazlaşygy gözleýänler üçin iň gowy saýlawdyr.
Günbatar Gara deňiz kenary: Gür tokaýlar we gadymy şäherler.
Stambuldan bary-ýogy üç sagatlyk ýolda gyşky dynç alyş merkezi bolan Bolu ýerleşýär. Abant kölüniň we Ýedigöller (Ýedi köl) milli seýilgähiniň golaýynda pyýada ýöremek we garly tokaýlaryň arasynda agaç jaýlarda dynç almak gyşky dynç alyşlara aýratyn gözellik goşýar. Göýnük we Mudurnu mineral çeşmeleri hem dynç alyşyňyza sagdyn täsir çaýar.
Karabük welaýatynyň Safranbolu şäheri ÝUNESKO-nyň Bütindünýä mirasynyň sanawyna hem-de "Cittaslow" (haýal şäher) derejesine girýär. Gar bilen örtülen taryhy osman öýleri we daş düşelen köçeler bellibir döwre gaýtaryp getirýär we wagtyň durmagyna sebäp bolýar. Bartyndaky Amasra, Sinopdaky İnjeburun, Gerze şäheri we Samsundaky Bandırma gämisiniň taryhy nusgasy hem hökman görülmeli ýerler bolup, sebitiň ähli gözelligini açyp görkezýär.
Gara deňiz aşhanasy
Gyşda Gara deňiz aşhanasy syýahatyň iň tagamly bölegine öwrülýär.
Tebigy ýagyň, mekgejöwen ununyň we ýerli peýniriň lezzeti ony gyzgyn guýmakda jemlenýär: kelem çorbasy, güýz güni öýde taýýarlanan turşular we elbetde, sowuk howada iň gowy tagam bolan hamsa balygy — bularyň hemmesi stoluň gaýtalanmajak bezegi bolar.
Aşpezlik syýahatyňyzy Trabzondan Akçaabat kotletleri, Hamsiköý süýtlaç (inçe tüwi tagamy), Samsun pidesi we Safranbolu türk lezzeti tamamlaýar. Rizeniň zumrut üzümçiliklerinde ösdürilip ýetişdirilen hoşboý ysly bir käse gyzgyn çaý uzak gyşky gezelençden soň janyňyza has-da hoş ýakar.
Show more